難得的假期

因為八號風球柏布先生襲港的關係，讓我今日有難得的半天假期。這是我開始工作以來的第一次呢。

尋晚去左學整藍莓芝士蛋糕。本來阿琳同我一齊去的，不過因為佢要OT，所以我惟有自己一個去啦。

首先睇下有咩材料先...

經過我地一輪努力，將呢d材料撈混之後，就可以將佢放入焗爐喇。攪完一輛，隻手真係好攰。

你睇~蛋糕新鮮出爐喇﹗

呢個就係我整架喇~

o係等蛋糕焗緊的時候，師傅仲用包書膠同印水紙整左d朱古力片比我地幫個蛋糕扮靚~

呢個就係師傅的製成品喇~

而呢個呢就係我整架喇~還不錯吧﹖哈哈

完成之後，師傅就將佢的製成品切開比我地分享，味道都幾好架﹗不過師傅話雪凍左，仲好食喎﹗
而我亦都驗證過喇，真係雪凍左好食d﹗
我將個蛋糕雪左一晚，今日就帶左返公司同d同事一齊分享。雖然個樣冇尋晚咁靚，不過真係好好食﹗
我d同事都話好食架~(哈哈~可能佢地唔敢話唔好食)

師傅尋晚仲特別加插左多一道甜品比我地試添﹗

等我黎同大家介紹下啦...佢地就叫做蕃薯金寶

未放入焗爐之前就係咁的樣架喇~(有d奇怪呀~呵﹖)

焗完之後個樣，原來係咁正常架﹗ 味道仲幾好架bor~

恐怕...

恐怕最終只是剩低我一個...

我不想這樣...

不捨得...真的不捨得

鍾意一千，唔鍾意三百萬﹖

今晚同爸媽一齊去阿女麻度食飯。我好耐冇去佢度食飯喇，真係不孝...

阿女麻見到我就梗係好開心啦，仲摸下我手臂睇下我有冇瘦到~

但係我唔使摸都見到阿女麻個肚腩大左好多呀﹗

阿女麻，要行多d﹗唔好咁懶喇﹗

後來，朗朗表妹黎到，我就撩佢傾計喇﹗

我﹕你好似細粒左咁既﹖
朗﹕係瘦左~
我﹕點解會瘦左既﹖
朗﹕因為我之前有一晚冇食飯囉﹗
我﹕冇食一晚飯就會瘦架喇﹖
朗﹕係呀，你未試過咩﹖
我﹕冇試過喎~(如果真係唔食一晚飯就會瘦，咁就好喇...)

跟住同佢一齊睇"一擲千金"，當o個個消防員o係度揀開邊d no. 的時候，

朗﹕都係形容靚架啦~
(經過一輪暸解，我終於明白佢想講乜...)

我﹕你話佢係見邊個靚女就揀邊個﹖
朗﹕係呀
我﹕咁個個都靚架啦
朗﹕唔係個個都靚
我﹕咁佢而家揀呢個靚唔靚﹖
朗﹕唔靚
我﹕咁即係唔係淨係揀靚架啦~
朗﹕靚又揀，唔靚又揀
我﹕......

然後，個消防員開左一個三百萬的no.，朗朗又有偉論要發表喇...

朗﹕我都唔鍾意三百萬~
我﹕咁你鍾意幾多呀﹖鍾意1蚊﹖
朗﹕唔係，我鐘意一千
我﹕咁你第時有三百萬，就比我啦，我比一千蚊你﹗
朗﹕好呀﹗

哈哈，我應該錄低呢段對話﹗等佢第時大個比返佢聽，免得佢唔認數﹗

發惡夢

尋晚我發左個惡夢...

我夢見我的一個朋友來到我公司工作。公司要搞一個幾難的project，其他人都覺得好難做，唔可行。但係我的呢位朋友就好積極咁遊說其他人一齊做。

下一幕我就見到自己o係度好努力咁搞緊個project的野。然後，K生行過黎同我講﹕"佢(指我的那位朋友)生cancer...唔使再搞個project喇﹗搞黎都冇意思﹗"當時，我感到好愕然，唔知道講d乜野好，只懂強忍住淚水。跟住，當我行經走廊的時候，我見到松鼠B o係度喊到好厲害，令到我更加想喊。

然後，我就行左去另一個位到坐低。老細走過黎問我個project搞成點，我就話唔使搞喇...點知佢好激動咁話﹕"唔搞﹖點解唔搞呀﹖快d搞﹗繼續搞﹗"

o個一刻我就終於忍唔住，伏o係枱上狂喊...

扎醒o個一刻才鬆一口氣，心想﹕好彩只係發夢姐~

唔發呢個夢，我都唔知原來我係咁大壓力...

所以，我今日忙完一朝之後，已經感到筋疲力盡了...要準時收工﹗

我諗另外一個原因導致我發呢個夢，可能係因為近日接二連三收到朋友家人有事要入醫院的消息吧。

對唔住...除左慰問同埋為你地祈禱之外，我冇乜野幫到手...

但我希望你地知道我會一直支持你地架﹗要加油呀﹗

2007年6月15日

今天上日文，沒有像平日那樣多笑聲。

因為平時笑得最大聲，說話最多的黃同學，今日突然變得很靜。

心想﹕她應該是心情不好吧...不知道發生了什麼事呢﹖

後來，她更提早離開。

下課後，我便問坐在她隔離的護士太太發生什麼事。

原來她的一個中學同學前日被車撞倒了，現在在醫院，情況危殆，可能過不了今晚...

真的很突然...她應該只有廿二、三歲吧...有誰想到會發生這樣的事呢﹖

她的家人和朋友必定很難過了﹗求主祢賜平安給他們﹗求主祢抹去他們的眼淚﹗

大家記住以後過馬路一定要小心呀﹗

おいしいですね

尋晚OT直到十二點幾，所以冇返到TWS練歌喇﹗

真的好累﹗所以，我今日成個人都覺得唔係好清醒咁...

首先，我double左影印啦...死...今晚d樹實黎搵我喇~

And then, 我就沖左兩次厠所...

好彩今晚上日文都幾開心，唔係就實訓著都似~:P

真的好開心可以識到幾個玩得埋的同學﹗

哈哈~我地今日好似開大食會咁...有人買西餅、有人買薯片...

而我就買左綠茶味桃哈多~喜歡它的綠茶味，但卻嫌它稍甜了點。

本來我今日係想去麥記買綠茶雪糕食架，點知要開會，搞到我遲左走...趕唔切喇

:(

尋日公司有同事從加拿大買來朱古力給我們分享，真的很好吃啊﹗

就係呢個喇~

唔知香港有冇得買呢﹖^_^

間歇性落樓梯恐懼症

上落樓梯，幾乎是每個人每一日都要做的。

但是，不知從何時開始，我患上了"間歇性落樓梯恐懼症"。

基本上，大部分時間，我落樓梯的時候，就如一般人一樣，很輕鬆的，很自然的去行。

但是，偶然會有一次，當我落樓梯的時候，心裡面會有一股恐懼感浮現。就是我每落一級樓梯，都會很怕跌下去似的。接著，我會開始感到雙腳無力，腳步浮浮站不穩。一直到我雙腳安全地踏在平地上，我才鬆一口氣。

我想這大概跟我初中時的一個經歷有關吧。

事發地點﹕粉嶺火車站外的行人隧道

事發經過﹕當時，我和一眾親戚正準備到粉嶺的蓬瀛仙館吃素。一路上，我手上都是抱著我的表妹的。一直走到行人隧道入口，我便想把表妹放下，讓她自己走。怎料她扭計，硬要我抱著她。她可不是輕的，對於當時只是初中生的我來說，抱著她下樓梯真的一點也不輕鬆。我想大概下了不到十級樓梯，我就連同我表妹一同掉下去。幸運地，表妹只是跌下一級，所以沒有什麼傷 (頂多只是擦傷了一點吧，我也不太記得了。) 而我呢，應該是再跌下多幾級吧。我記得我當時應該起碼有幾秒鐘時間是失去了知覺。我只記得我醒來的時候，有好心的途人遞來白花油給我嗅。

我也是從年幾前開始，才注意到我自己有這個症狀的。

所以，如果大家以後看到我下樓梯的時候，突然間走的很慢的話，請不要催我...

今日本來start off 都幾lucky既...

話說我今朝遲左起身，所以要搭的士。由我起身到上的士之後，天氣一直都好好既。點知架的士開左冇幾耐，就開始傾盆大雨。由冇到有，都真係幾秒間的事。好彩我臨出門口前，臨崖勒馬決定攞返把傘姐~

就連個司機都忍唔住話﹕我載你之前，真係一滴雨都冇架﹗而家又落到咁大﹗
我﹕係囉~突然間落咁大雨 (心諗﹕可能我係貴人呢~哈哈)

點知到我就黎要落車的時候，又突然間細雨左好多喇喎﹗

司機先生又出聲喇﹗"睇黎你落車都唔使點淋雨喇喎~"

實在係太奇妙喇﹗Thank God!!

所以，最終我把傘都係唔需要用到既﹗

返到公司，初初都ok既，可以比我專心做我手頭上的工作。

點知紅姐一個電話打黎，要我寄膠袋比佢。

膠袋有啦...呀...應該要寄埋紙咭比佢喎

因為我手頭上的紙咭唔夠，所以我就入去packing room搵啦~

點知那名"好心人"又唔知將我d野放左去邊喇，搞到我搵左好耐都搵唔到﹗我只係見到好多其他division的野放左o係我地o個位度...

自從那人黎左之後，今次已經唔係第一次唔見野...

佢唔係好proud of 佢自己識英文架咩﹖咁點解佢搬d野之前，唔睇清楚物主係邊個﹖﹖

都唔知要同佢講幾多知先明...

每次問佢我d野係邊，佢只會答﹕唔知呀﹗我冇郁過你d野喎...

我每次都只能無言以對...

原諒我發憫...我今日心情真係唔係幾好...

咁就惟有寄住幾張比紅姐頂住檔先啦~

跟住我就繼續好努力咁寫辦啦...諗住拿拿臨寫完就走~

點知大人叫我留低開會，問我趕唔趕住走...

咁我諗住佢開一陣架姐，咪話好囉~ (其實我約左人食lunch，再去睇海盜王(3:10pm)，算啦...最多唔同佢地食飯架姐~)

點知開到成兩點十先開完，其實中間我已經有d小動作暗示我想走架喇...點知大人仲要繼續講...

搞到咁晏，本來我都有諗過唔去睇架喇，都已經冇晒心情睇啦。不過，又買左飛，算啦...即使只係睇到半場都去啦﹗

o係火車上，我強忍住淚水...心想﹕恐怕我要日日加班，做晒d野，才能滿足到那一班高層的慾望吧。

去到戲院，遲左大約半個鐘，missed左發哥出場最多的那一段。好彩套戲夠長，都仲有成兩個幾鐘可以睇。

睇完戲，返到屋企都差唔多七點喇，我先至突然間覺得好肚餓...(因為我連lunch都冇食到...只係早餐食左個合桃蛋糕...同埋睇緊戲o個時飲左盒豆奶)

見到雪櫃有蔥油餅，就叮左黎食...食左一小塊...咁咸既﹖都係唔食喇...

跟住就叮淘大的燒賣食，食左一粒...點解又係咁咸既﹖我以前食都唔係咁咸架~

我開始懷疑究竟係我的問題定係d野食真係咁咸呢﹖

或者我真係不如helen咁愛咸啦~哈哈

唔知你地有冇以下的經驗呢...

當你想對朋友講某樣野的時候，你發覺佢根本冇在意聽...
跟住你就會停止，唔再講落去...
可能佢並非有意唔用心去聽，只係佢感覺唔到你o個一刻好想佢做你的聆聽者，想佢明白你的處境，想佢比你一點支持，給你一點安慰同鼓勵。
無論如何，那一刻你所得到的只有被忽略的感覺。心情便會更添沉重...
到下一刻，即使你朋友想聽，可能你已經唔想再講喇。

所以，請珍惜每一刻有朋友想同你分享的機會。要學習做一個好的聆聽者。
這也是一個我對自己的提醒。

2007年6月1日

今日終於鼓起勇氣，戴左我副新眼鏡返工。各同事對我呢個新形像的評價不一。

同事H﹕嘩，你做咩事呀﹖(戴下眼鏡姐~~唔使咁驚訝呀﹖=_= )

同事W﹕你好似小雲﹗ (其實你戴眼鏡o個時都好似小雲~hehe)

同事K﹕做咩今日咁可愛呀﹖ (都唔知係笑我定讚我﹖)

同事C﹕新架﹖幾好睇呀~ (你係第一個同事咁講~多謝你﹗)

同事T﹕幾好睇呀~ (竟然仲有第二個...多謝...)

綜合以上的意見，我諗我都係....

呀﹗仲漏左一個...

老闆﹕嘩~你副眼鏡咁似落disco既﹖ (落disco係唔會戴眼鏡架喎~)

我 (疑惑地笑)﹕似咩﹖

綜合以上的意見，我諗我都係...

間中戴下好喇...哈哈

今日終於都攞左我副新眼鏡...新嘗試~希望ok啦﹗

晚飯同eugene, carmen, 文文去左"火間土"食~good time!

我今日自己食左一個703，感覺冇上次同陳小b佢地食咁好味~可能少食多滋味卦﹗我仲食左個柚子芒果布甸。布甸其實都幾滑，幾好味，不過就唔係好有芒果味囉~而且略嫌d柚子蜜苦味太重~

最好食都係個薯蓉芝士串燒~おいいしですね

食完飯，我就搭巴士返屋企喇。本來我o係度睇緊書，不過睇睇下覺得好眼訓，就訓著左喇...

因為我覺得眼訓的時候，已經係仲有十幾分鐘就會到，所以我都唔敢訓得太lum。我都係每訓幾分鐘就張開眼。到臨近我要落車o個個站之前，我係合埋眼幾秒又張開...點解仲未到既﹖就又合埋眼...跟住突然睜開眼的時候，就發現有d唔妥喇...

原來我訓過頭，架車已經去到總站喇﹗不過好彩，我要落車o個個係尾二o個個站，所以唔使行好遠~

Show Mi 鄭秀文 2007演唱會

2006年5月24日





今日我, 容小b, edwin同佢個fd去左睇sammi 演唱會(第七場)。本來今日係冇得睇架，多得edwin幫我班返黎的兩張飛﹗$100 第33行~還算不錯吧﹗

演唱會大約8:40pm開始，到大約11:20pm完。等左三年，大家似乎都很期待這次的演唱會。現場的氣氛很熱鬧，唱到中段快歌的時候，連坐$200的企起身。至於我嘛...$100姐...就梗係唔企啦﹗其實我係驚會跌落去姐~哈哈﹗

很喜歡中間的一段accepella，雖然略嫌有點長，但真係好好聽﹗

sammi今晚唱左好多好舊的歌(超過十年前的)。hehe~其實我o個時都幾鍾意佢架，所以聽起那些舊歌來便特別投入。不過而家就冇以前咁鍾意lu~可能因為人大了，不再迷偶像吧。哈~

很喜歡<薩 拉 熱 窩 的 羅 密 歐 與 朱 麗 葉>、<不拖不欠>...

還記得以前睇<百分百感覺>，其中一幕係sammi唱<不拖不欠>，o個幕令我忍唔住流淚。即使睇第二次都係一樣...哈哈~我就是一個如此眼淺的人。

今次係我第二次睇佢的演唱會，第一次我都唔記得係幾時lu~我只係記得o個次我係唔使比錢去睇既。點解﹖哈哈...真係到而家講出黎都有點難以置信~

即係點﹖係咁既~話說某年某月某日，我同媽咪去百佳買野。行行下，我見到有隻新出的yogurt的包裝紙上寫著"抽獎"、"鄭秀文演唱會門票兩張"。雖然冇諗過真係會抽得中，不過都吸引左我去買呢隻yogurt(況且我又鍾意食呢)。咁結果當然係中左啦﹗仲要係$200飛喎~對當時仲係中學生的我來說，真係開心到不得了﹗我諗人生真係冇幾多個咁好彩，仲要我只係寄左一次就中。唔知係咪因為冇乜人買o個隻yogurt呢~hehe

講返今晚場演唱會先...今晚係何韻詩做嘉賓。佢作左一個中性的打扮，同sammi合唱<我們的主題曲>，好好聽﹗跟住佢就自己唱佢o個首<光明會>。雖然唔係太鍾意聽呢首歌，不過佢真係好帶動到現場的氣氛。

容小b話有個位會好感動，佢買我會喊喎。咁我就梗係話我唔會啦﹗結果...我都真係冇喊到喎...哈哈~幾叻﹗不過，其實係因為佢冇講到容小b所指好感動o個d野。完場之後，我問返佢究竟係講咩。原來sammi之前拍"長恨歌"的時候，佢媽媽都有陪佢一齊去。因為sammi要飾演不同年紀的角色演變，佢要一個星期內減十幾磅。鄭媽媽知道左，就自己躲o係一間小屋度喊。這個情境剛好讓sammi見到，佢就覺得自己好對唔住媽媽。

如果sammi真係有講呢一部分，可能我真係會喊都未定。

到完場，冇encore...大家都唔願走...想等下sammi會唔會出返黎。燈都開晒，就梗係冇啦~仲要播多一次廣播，d人先陸陸續續咁離開。

分手快樂

分手快樂 by 梁靜茹

我無法幫妳預言　委曲求全有沒有用
可是我多麼不捨　朋友愛的那麼苦痛
愛可以不問對錯　至少要喜悅感動
如果他總為別人撐傘 妳何苦非為他等在雨中

泡咖啡讓妳暖手　想擋擋妳心口裡的風
妳卻想上街走走　吹吹冷風會清醒的多
妳說妳不怕分手　只有一點遺憾難過
情人節就要來了　剩自己一個
其實愛對了人　情人節每天都過

分手快樂　祝妳快樂　妳可以找到更好的
不想過冬　厭倦沉重　就飛去熱帶的島嶼游泳

分手快樂　請妳快樂　揮別錯的才能和對的相逢
離開舊愛　像坐慢車　看透徹了心就會是晴朗的
沒人能把誰的幸福沒收　妳發誓妳會活的有笑容

妳自信時候真的美多了

把這首歌送給妳，衷心的希望妳過得開心﹗
不要再為他流淚了，好嗎﹖

《聖經》！不雅？與《中大學生報》情色版
葉敬德
香港浸會大學校牧
宗教及哲學系副教授

由《中大學生報》情色版所引發的風波經已漸漸演變為一場政治的角力。日前有二千多人投訴《聖經》不雅，要求將《聖經》和合本呈交評級。雖然影視處已決定不把《聖經》送檢，但此事引發的議題，仍頗值探究。

首先，眾所周知，在中國的古代神話中，伏羲和女媧是兄妹通婚的；在古代的近東，同父異母的結合亦是社會所接納的……。因此，涉及暴力、亂倫等等的歷史、傳說、神話……的記載斷不止《聖經》部分的內容。如果只要有這類記載的文獻，亦有人投訴便要呈交評級，則受牽連的將會是更多的古代經典，這種思維也可能會令其他宗教的經典陷進了評級的漩渦。筆者在此只可以提醒，宗教是人生命的根本，如果我們攻擊別人的根本，換來的亦只會是一批敵人。

第二，這些古代記載的出現當然有其獨特的背景。然而，這些經典會否構成「不雅」則要看我們如何界定不雅。目前《淫褻及不雅物品管制條例》所用的是一種三級的分類制。原則上，不雅和淫褻是指本質相同而程度上或嚴重性相異的東西。評級的結果是反映了淫褻物品審裁小組成員所代表的「社會所能夠接受的程度」。1973年美國最高法院「米拿對加州」 (Miller v. California) 將「淫褻」定義為一些「公開地冒犯」 (patently offensive) 當地「社群標準」的，以「好色的趣味」 (prurient interests) 吸引人的描述或作品。所以，不雅和淫褻是指一些露骨地展示性，令人對性產生興趣，但這種興趣是超越了當地社群所能接受的程度的作品。至於是「不雅」或「淫褻」則要視其超越的嚴重性作決定。

如果我們以這個標準來審裁《聖經》相關的記載，我們便會看見《聖經》雖然載有亂倫、強姦的事件或故事，但《聖經》並沒有就此對性作露骨的描述，讀者們也不會因此而對這類性行為產生興趣。況且《聖經》整體是反對這類行為的。所以，我們從何談《聖經》不雅呢？如果僅僅因為有這類行為的記載便被列為不雅，那或許是一次文字獄的序幕吧！

相反，如果我們以這個標準來審裁《中大學生報》情色版，則我們看見部分內容是以一系列以「想」或「幻想」引導讀者進入有關亂倫和獸交等思想領域，而這種引導性的問題會否吸引讀者產生對亂倫和獸交的興趣則是頗值思考。這部分的內容明顯是超越了「第一級」的標準，如果不放在「第二級」又應該怎樣評級呢？或許我們現時的三級制是否足以反映現實的需要呢？

或許有人認為《中大學生報》情色版是不應該被淫褻物品審裁小組審裁的，因為審裁會窒礙了言論和學術的自由和縮窄了文化探索的空間。但是，這並不是先檢後出版，也沒有要求該報停刊，被列為「不雅物品」亦僅被要求加上適當的封套和警告的字句，那又如何和怎樣窒礙了言論和學術的自由和縮窄了文化探索的空間呢？筆者在此不禁要問，《中大學生報》情色版是甚麼性質的刊物？它所作的是甚麼學術研究？是否冠上了某某大學名字的刊物，其內容便自動變成了學術？學術是否有某種要求？該刊物的內容是否符合這些要求呢？

《中大學生報》的代表先前在電視表示知道該報仍有改善的空間，亦已明白社會的標準，並會作出調整，那是否表示該報在出版時或有顧及卻未有掌握到，或根本未有顧及社會的標準呢？常識告訴我們，享有多大的自由，擁有多大的權力，亦要肩負多大的責任。如果我們要擁有那麼大的言論、學術和文化探索的自由，那麼我們又如何看待責任的問題呢？雖然筆者希望有關當局能夠放棄起訴的權利，但如果我們顧及卻未有掌握到或根本未有顧及社會的標準，有關人士是否也相應地要為此而負責呢？

作為教育工作者，我們當然支持年青的一輩，希望他∕她們能夠在一個自由開放的環境下成長。或許透過《中大學生報》情色版事件我們可以要求檢討現時《淫褻及不雅物品管制條例》所用的三級的分類制，甚至我們可以對淫褻物品審裁小組成員所代表的社會標準提出疑問，但那種「錯不在我，責任盡在他∕她人」的態度又是否教育工作者所樂於看見的呢？或許我們所處的已經是一個不能夠容許人犯錯，承認責任便會「人頭落地」的社會？或許年青一輩是如此自信，甚至令他∕她們漸漸忘記了自省的重要性？或許今天我們給年青一輩所留下的榜樣是「事事企硬」，只要拿出一堆堂皇的理想作理由，有足夠的政治力量作後盾，便可以扭轉局勢，轉危為安？我們期望未來社會的棟樑是一些「深懂生存之道」的人？有承擔的人？有責任感的人？
(本文曾發表於2007年5月19日星島日報)

2007.05.13 母親節

今天一早便出發去將軍澳墳場拜祭爺爺了。今年的人比去年多，長長的車龍排滿了整個山頭。幸好我們離開時，下山的車輛比較少，我們才可順利下山。

等待離開的時候，雯雯表妹跟我們分享了一件她妹妹(朗朗)的趣事。話說朗朗在上游泳堂的中途發現她媽媽不在，就開始哭了。於是她的老師就叫雯雯去安慰妹妹喇。

雯﹕你做咩喊呀﹖

朗﹕嗚....

雯﹕咩事呀﹖

朗﹕嗚嗚...

雯﹕你要講比我知咩事，我先可以幫到你架~

朗﹕我唔知邊個同我沖涼呀﹗嗚~

哈哈...真是完全猜不到竟然是這樣的答案呀﹗﹗

謝謝好友琳的一條龍服務﹗我會用心的寫好這個blog的﹗

還有，謝謝妳給我的pingu，真的很喜歡啊﹗希望妳有個愉快的旅程啦﹗